بچپن سے کیے وعدے اور نئی شخصیت

سمے وار (تحریر: مریم عمر)
ایک عجیب سی بات ہے کہ ہمارا اپنے ماضی، خصوصاً اپنے کم عمر روپ کے ساتھ ایک خاص تعلق ہوتا ہے۔ ہم اپنی زندگی کا ایک بڑا حصہ اس تصور میں گزار دیتے ہیں کہ مستقبل میں ہم کیسے انسان بنیں گے۔ بچپن ہی سے ہم اپنے آنے والے کل کے متعلق بے شمار خواب سجاتے ہیں۔ ہم طے کرتے ہیں کہ ہمیں کیا حاصل کرنا ہے، کس قسم کی زندگی گزارنی ہے، کن لوگوں کے ساتھ وقت گزارنا ہے اور سب سے بڑھ کر یہ کہ ہمیں کیسا انسان بننا ہے۔ ہم خود سے ایسے وعدے کر بیٹھتے ہیں جن کی اہمیت اور نتائج کا ہمیں اس وقت شاید پوری طرح ادراک بھی نہیں ہوتا۔
کم عمری میں مستقبل ایک ایسی منزل معلوم ہوتا ہے جہاں پہنچ کر زندگی کی تمام الجھنیں خود بخود سلجھ جائیں گی۔ ہمیں لگتا ہے کہ عمر کے ساتھ ساتھ فہم و فراست میں اضافہ ہوگا، ہم زیادہ پُراعتماد ہو جائیں گے اور اپنے فیصلوں کے بارے میں پہلے سے کہیں زیادہ پُریقین ہوں گے۔ ہم یہ فرض کر لیتے ہیں کہ جن چیزوں کو آج ہم اہمیت دیتے ہیں، وہ کل بھی ہمارے لیے اتنی ہی اہم رہیں گی، ہمارے نظریات تبدیل نہیں ہوں گے اور مستقبل میں ہمارا وجود محض ہمارے موجودہ وجود کا ایک زیادہ کام یاب اور بہتر روپ ہوگا۔
لیکن بڑے ہونے کا عمل ہماری ان تمام خوش فہمیوں کو کسی نہ کسی موڑ پر چیلنج ضرور کرتا ہے۔
ہم بدلتے ہیں۔ کبھی اپنی مرضی سے، کبھی حالات کے زیرِ اثر اور کبھی اس تبدیلی کا احساس کیے بغیر۔ ہماری ترجیحات تبدیل ہونے لگتی ہیں، ہمارے نظریات میں وسعت آتی ہے اور وہ چیزیں جنھیں کبھی ہم اپنی زندگی کے لیے ناگزیر سمجھتے تھے، رفتہ رفتہ اپنی اہمیت کھونے لگتی ہیں۔ زندگی کے تجربات ہمیں ایسے خیالات سے روشناس کرواتے ہیں، جن کے بارے میں ہم نے کبھی سوچا بھی نہیں ہوتا۔ کچھ لوگ ہمارے سوچنے کا انداز بدل دیتے ہیں، کچھ واقعات ہماری ترجیحات ازسرِنو مرتب کرنے پر مجبور کر دیتے ہیں اور بعض حالات ہمیں ان باتوں پر بھی نظرِ ثانی کرنے پر آمادہ کر دیتے ہیں جنھیں ہم کبھی ناقابلِ تغیر سمجھتے تھے۔ اس تمام عمل کے دوران ہمیں احساس بھی نہیں ہوتا کہ ہم کس قدر تبدیل ہو چکے ہیں۔
شاید اس تبدیلی کا سب سے عجیب پہلو یہ ہے کہ یہ کبھی دستک دے کر نہیں آتی۔ کوئی ایک مخصوص صبح نہیں ہوتی جب ہم بیدار ہو کر اچانک یہ دریافت کریں کہ ہم پہلے جیسے نہیں رہے۔ یہ تبدیلی چھوٹے چھوٹے واقعات اور معمولی دکھائی دینے والے لمحات کے ذریعے وجود میں آتی ہے، جو وقت گزرنے کے ساتھ ہماری شخصیت کا حصہ بنتے جاتے ہیں۔ کوئی گفتگو ہماری سوچ بدل دیتی ہے، کوئی مایوسی ہماری توقعات کا رخ موڑ دیتی ہے اور کوئی تجربہ ہماری ترجیحات کو نئے معنی دے دیتا ہے۔ ہم ان تبدیلیوں کو ہمیشہ اسی وقت محسوس نہیں کر پاتے جب یہ رونما ہو رہی ہوتی ہیں۔ اکثر ان کا احساس ہمیں تب ہوتا ہے جب ہم ماضی کی طرف پلٹ کر دیکھتے ہیں اور محسوس کرتے ہیں کہ اب ہم پہلے جیسے نہیں رہے۔
اور شاید یہی وہ لمحہ ہوتا ہے جب یہ حقیقت قدرے پریشان کن محسوس ہونے لگتی ہے۔
کبھی کبھار ماضی کی کوئی تصویر، پرانی ڈائری کا کوئی صفحہ، برسوں پہلے کی کوئی گفتگو یا کسی بھولی بسری خواہش کی یاد ہمیں اپنے ایک ایسے روپ کے سامنے لا کھڑا کرتی ہے جس سے کبھی ہم بخوبی واقف تھے۔ چند لمحوں کے لیے ہم اسی وقت میں واپس چلے جاتے ہیں جہاں ہمارے خواب واضح اور مستقبل امکانات سے بھرا ہوا محسوس ہوتا تھا۔ ہمیں یاد آتا ہے کہ ہم کیا چاہتے تھے، کن چیزوں پر یقین رکھتے تھے اور اپنے آنے والے کل کے بارے میں کس قدر پُراعتماد تھے۔ لیکن ان تمام باتوں کو یاد رکھنے کے باوجود، اب ہمارے لیے اس شخص کی سوچ سے مکمل طور پر ہم آہنگ ہونا ممکن نہیں رہتا جو کبھی ان تمام خواہشات اور نظریات کا حامل تھا۔
اس بات میں ایک عجیب سی اداسی پوشیدہ ہے کہ ہمیں آج بھی یاد ہے کہ کبھی ہم کون ہوا کرتے تھے، مگر اب ہم خود کو اس شخصیت سے وابستہ محسوس نہیں کرتے۔
شاید یہی وجہ ہے کہ کبھی کبھار ہم اپنے ہی ان روپوں کو یاد کر کے افسردہ ہو جاتے ہیں جو کبھی حقیقت کا حصہ نہ بن سکے۔ ہم کسی مخصوص ناکامی یا ضائع ہو جانے والے موقع کا سوگ نہیں منا رہے ہوتے، بلکہ دراصل ایک ایسی ممکنہ زندگی کو یاد کر رہے ہوتے ہیں جو شاید ہماری ہو سکتی تھی۔ وہ پیشہ جسے اختیار کرنے کا کبھی خواب دیکھا تھا، وہ خواہشات جنھیں خاموشی سے ترک کر دیا، وہ خوبیاں جنھیں اپنے اندر پیدا کرنے کا ارادہ کیا تھا اور وہ شخصیت جس کے وجود کا ہمیں پورا یقین تھا۔ ہمارے یہ تمام ممکنہ روپ کہیں ہماری یادوں اور تصورات کے درمیان موجود رہتے ہیں۔ نہ وہ مکمل طور پر ہمارے ماضی کا حصہ ہوتے ہیں اور نہ ہی ہمارے حال کا۔
اور دوسری طرح کے نقصانات کے برعکس، یہاں کسی اختتام کا کوئی واضح لمحہ بھی موجود نہیں ہوتا۔ ہم بس زندگی میں آگے بڑھتے رہتے ہیں، اکثر اس احساس کے بغیر کہ راستے میں اپنے وجود کا کوئی حصہ پیچھے چھوڑ آئے ہیں۔
یہاں ایک دلچسپ سوال پیدا ہوتا ہے: آخر ہم اپنے ماضی کے وجود کے کتنے مقروض ہیں؟
میرے خیال میں ہم اپنے کم عمر روپ کے اتنے ہی مقروض ہیں جتنا عموماً ہم تسلیم نہیں کرتے۔ ممکن ہے کہ ہمارا ماضی کا وجود ناتجربہ کار ہو، اس کی خواہشات غیر حقیقی ہوں اور مستقبل کے بارے میں اس کے تصورات قدرے غیر عملی ہوں، لیکن اس کا مطلب یہ نہیں کہ اس کے خواب اور ارادے بے معنی تھے۔ اس نے ایسے امکانات کا تصور کیا تھا جن پر ہم نے ابھی سوال اٹھانا بھی نہیں سیکھا تھا۔ اس کے کچھ مقاصد تھے جنہیں سنجیدگی سے لیا جانا چاہیے تھا اور کچھ ایسے مستقبل تھے جن پر اسے اس وقت پورا یقین تھا جب زندگی کے تجربات نے ابھی اسے ان کی حقیقت سے روشناس نہیں کروایا تھا۔
تو پھر یہ قدرے ناانصافی محسوس ہوتی ہے کہ محض عمر بڑھ جانے کی وجہ سے ہم ان تمام توقعات کو غیر اہم قرار دے دیں۔
یقیناً اس کا یہ مطلب نہیں کہ ہمیں اپنی زندگی میں کبھی بھی کسی خواہش یا مقصد سے دستبردار نہیں ہونا چاہیے۔ کسی خواب کو ترک کرنے کی ایک وجہ یہ ہو سکتی ہے کہ ہم حقیقتاً اس سے آگے بڑھ چکے ہیں، جب کہ دوسری وجہ یہ بھی ہو سکتی ہے کہ اس کے حصول کی کوشش مشکل، تکلیف دہ یا خوفناک محسوس ہونے لگی ہے۔ ان دونوں میں ایک بنیادی فرق موجود ہے۔ پہلی صورت میں ہم شاید خود کو بہتر طور پر سمجھنے لگے ہیں، جبکہ دوسری صورت میں ممکن ہے کہ ہم نے خود پر یقین کھونا شروع کر دیا ہو۔
شاید اپنے ماضی کے وجود کے ساتھ ہماری اصل ذمہ داری یہ نہیں کہ ہم اس کی ہر توقع پوری کریں، بلکہ یہ ہے کہ ان توقعات کو ترک کرنے سے پہلے انھیں دیانت داری سے سمجھنے اور پرکھنے کی کوشش ضرور کریں۔ ہمیں اپنی رائے تبدیل کرنے کا حق حاصل ہے، لیکن ہمیں خود سے یہ سوال کرنے کی ہمت بھی رکھنی چاہیے کہ آخر ہم نے اپنی رائے کیوں تبدیل کی۔
تاہم اس بحث کا ایک دوسرا پہلو بھی ہے۔ ہم جس شخصیت کو کبھی بننے کا خواب دیکھا کرتے تھے، اس کے بارے میں سوچتے ہوئے شاید ہی کبھی یہ سوال کرتے ہیں کہ کیا آج بھی ہم واقعی وہی انسان بننا چاہتے ہیں؟
ذرا اپنی کم عمری کی خواہشات پر غور کیجیے۔ ان میں سے کتنی آج بھی آپ کے لیے اتنی ہی اہمیت رکھتی ہیں؟ جن خوبیوں کو کبھی آپ اپنی شخصیت کا لازمی حصہ بنانا چاہتے تھے، کیا آج بھی انہیں اتنا ہی قابلِ قدر سمجھتے ہیں؟ کیا وہ شخص جسے آپ کبھی بننے کا خواب دیکھا کرتے تھے، واقعی آپ کو زیادہ خوش اور مطمئن کر سکتا تھا، یا آپ محض ایک ایسے تصور سے وابستہ ہو چکے ہیں جس پر آپ نے اتنا عرصہ یقین کیا ہے کہ اب اس پر سوال اٹھانا بھی کسی خیانت سے کم محسوس نہیں ہوتا؟
بعض اوقات ہم اپنے ماضی کے وجود کو غیر ضروری طور پر مثالی بنا دیتے ہیں اور یہ بھول جاتے ہیں کہ اس وقت دنیا کے بارے میں ہماری سمجھ کتنی محدود تھی۔ ہمیں ان تجربات کا سامنا نہیں ہوا تھا جو آگے چل کر ہمارے فیصلوں پر اثر انداز ہونے والے تھے۔ ہم ان لوگوں سے نہیں ملے تھے جو ہماری سوچ بدلنے والے تھے، نہ ہی ہم نے ایسے حالات دیکھے تھے جو ہمیں اپنے نظریات پر نظرِ ثانی کرنے پر مجبور کرتے۔ ایک بامقصد اور مطمئن زندگی کے بارے میں ہمارا تصور صرف ان چیزوں پر مبنی تھا جن سے ہم اس وقت واقف تھے۔ اس میں کوئی غیر معمولی بات نہیں۔
شاید اپنے کم عمر روپ کے ہر فیصلے کے ساتھ ہمیشہ وفادار رہنے کی توقع رکھنا بھی اس حقیقت سے انکار کرنے کا ایک طریقہ ہے کہ ہم خود کس قدر تبدیل ہو چکے ہیں۔
اس کے باوجود، میں نہیں سمجھتی کہ ہماری توقعات اور حقیقت کے درمیان موجود فاصلہ اس وجہ سے کم اہم ہو جاتا ہے۔ یہ احساس کہ آپ بالکل مختلف انسان بن چکے ہیں، جس کا تصور کبھی آپ نے اپنے لیے نہیں کیا تھا، کسی حد تک پریشان کن ضرور ہوتا ہے۔ یہ ہمیں اس حقیقت کا سامنا کرنے پر مجبور کرتا ہے کہ جس شخصیت کے بننے کا ہم نے برسوں انتظار کیا، ممکن ہے وہ کبھی وجود میں ہی نہ آئے۔ اور اگرچہ یہ تسلیم کرنے میں ایک خاص آزادی ہے کہ ہم اپنے ماضی کے تصورات کے پابند نہیں، لیکن اس کے ساتھ ایک اداسی بھی وابستہ ہے کہ زندگی کے کچھ امکانات ہمیشہ کے لیے گزر چکے ہیں۔
ہم اکثر ذاتی نشوونما کو ایک مکمل طور پر مثبت عمل کے طور پر پیش کرتے ہیں، گویا ہر تبدیلی لازماً ہمیں پہلے سے بہتر انسان بنا دیتی ہے۔ لیکن شاید ہم اس دوران ان چیزوں کو نظر انداز کر دیتے ہیں جنھیں ہم نے کھو دیا۔ ہر تبدیلی ہمیں بہتر نہیں بناتی۔ کبھی ہم اس قدر محتاط ہو جاتے ہیں کہ وہ جرات باقی نہیں رہتی جو کبھی ہماری شخصیت کا حصہ ہوا کرتی تھی۔ کبھی مایوسیوں کے عادی ہو کر ہم مختلف نتائج کی توقع کرنا ہی چھوڑ دیتے ہیں۔ کبھی اپنے شوق کھو دیتے ہیں، اپنے مقاصد ترک کر دیتے ہیں یا رفتہ رفتہ اپنی شخصیت کے کچھ ایسے پہلوؤں سے محروم ہو جاتے ہیں جنھیں کبھی ہم اپنی پہچان سمجھتے تھے۔
یہ سوال کرنا بھی ضروری ہے کہ کیا بڑے ہونے کے ہر تجربے کو خوش آئند سمجھنا چاہیے، یا کچھ چیزیں ایسی بھی ہیں جنہیں کھو دینے کا افسوس محسوس کرنا بالکل فطری ہے؟
شاید اس کا مقصد یہ نہیں کہ ہم اپنے ماضی کے وجود کو غیر ضروری طور پر مثالی بنائیں یا اپنی موجودہ شخصیت کو تنقید کا نشانہ بنائیں، بلکہ یہ سمجھنا ہے کہ ہماری شخصیت کے دونوں روپ یک ساں طور پر سمجھ اور ہمدردی کے مستحق ہیں۔ ہمارا ماضی کا وجود ایک ایسی دنیا میں زندگی گزار رہا تھا جس کے تجربات سے وہ ابھی ناواقف تھا، جبکہ ہمارا موجودہ وجود ایک ایسی دنیا کو سمجھنے کی کوشش کر رہا ہے جس کے تمام پہلو ابھی اس پر واضح نہیں ہوئے۔ نہ ماضی کے پاس تمام جوابات تھے اور نہ ہی ہمارے حال کے پاس۔
شاید اس بات کو تسلیم کرنے میں بھی ایک خاص آزادی ہے کہ ہم ابھی مکمل طور پر اپنی شخصیت کی تشکیل کے عمل سے نہیں گزرے۔ ہم عموماً اپنی شناخت کو ایک ایسی چیز سمجھتے ہیں جسے ایک خاص عمر تک دریافت کر کے اس پر اطمینان حاصل کر لینا چاہیے، لیکن ممکن ہے کہ ہماری شخصیت اس سے کہیں زیادہ تغیر پذیر ہو۔ آج ہم جو انسان ہیں، مستقبل میں پیش آنے والے ایسے تجربات سے متاثر ہوں گے جن کا ہمیں ابھی کوئی اندازہ نہیں۔ ہماری وہ گفتگو جو ابھی ہونی باقی ہیں، وہ لوگ جن سے ابھی ملاقات نہیں ہوئی اور وہ حالات جن کا سامنا ابھی کرنا باقی ہے، یہ سب ہمارے وجود کو کسی نہ کسی طرح تبدیل کریں گے۔ جن باتوں کے بارے میں آج ہمیں مکمل یقین ہے، ممکن ہے کہ آنے والے برسوں میں انھی پر ہم ازسرِنو غور کر رہے ہوں۔
اور شاید ہمیں اس حقیقت کو قبول کرنا سیکھنا چاہیے۔
شاید زندگی کی اسی غیر یقینی کیفیت کو مرزا غالبؔ نے اپنے اس شعر میں نہایت خوب صورتی سے بیان کیا ہے:
بازیچۂ اطفال ہے دنیا مِرے آگے
ہوتا ہے شب و روز تماشا مرے آگے
زندگی واقعی کتنی عجیب ہے۔ ہم ایک مستقبل کا تصور کرتے ہیں، اس کے مطابق اپنے خواب ترتیب دیتے ہیں، لیکن وقت گزرنے کے ساتھ وہی زندگی ہمیں ایسے تجربات سے روشناس کرواتی ہے جن کا کبھی ہم نے تصور بھی نہیں کیا ہوتا۔ شاید یہی زندگی کی سب سے بڑی حقیقت ہے کہ ہم اسے جتنا بھی سمجھنے کی کوشش کریں، یہ ہمیں حیران کرنے کے نئے طریقے ڈھونڈ ہی لیتی ہے۔
اگر ہمیں کبھی اپنے کم عمر وجود کے سامنے بیٹھنے کا موقع ملے تو نہ جانے وہ گفتگو کیسی ہوگی۔ کیا وہ ہمیں پہچان پائے گا؟ کیا اسے ہماری کام یابیوں پر فخر ہوگا، یا وہ ان خوابوں کے بارے میں سوال کرے گا جنھیں ہم نے راستے میں کہیں پیچھے چھوڑ دیا؟ کیا ہم اسے یہ سمجھا سکیں گے کہ کچھ چیزیں اب ہمارے لیے اہم کیوں نہیں رہیں، کچھ مقاصد کے حصول میں اتنی دیر کیوں لگی اور ہماری زندگی اس تصور سے اتنی مختلف کیوں نکلی جو کبھی ہم نے اپنے لیے قائم کیا تھا؟
اور سب سے بڑھ کر، کیا ہم اپنے جوابات سے مطمئن ہوں گے؟
میرے خیال میں ہم اپنے کم عمر وجود کے مقروض اس حد تک نہیں ہیں کہ ہمیں لازماً وہی زندگی گزارنی چاہیے جس کا اس نے کبھی تصور کیا تھا۔ یہ توقع ایک ایسے انسان سے وابستہ کرنا غیر منصفانہ ہوگا جو مسلسل سیکھ رہا ہے، تبدیل ہو رہا ہے اور اپنے بارے میں نئی حقیقتیں دریافت کر رہا ہے۔ لیکن میں یہ ضرور سمجھتی ہوں کہ ہم اس کے ساتھ دیانت داری کے پابند ہیں۔ ہم اس کے خوابوں کو حقیقت کا روپ دینے کی کوشش کے، ان چیزوں پر سوال اٹھانے کے جو اب ہماری زندگی میں اپنی اہمیت کھو چکی ہیں، اور اس بات کو سمجھنے کے پابند ہیں کہ کہیں ہم غلط وجوہات کی بنا پر تو اپنے مقاصد سے دست بردار نہیں ہو رہے۔
بڑے ہونے کا مطلب یقیناً اپنی شخصیت کے کچھ پرانے روپ پیچھے چھوڑ دینا ہے۔ کچھ خواب تبدیل ہوں گے، کچھ توقعات بے معنی ہو جائیں گی اور کچھ وعدے ایسے رہ جائیں گے جنھیں پورا کرنا اب ممکن نہیں ہوگا۔ لیکن شاید ہمیں اس بات کا خیال رکھنا چاہیے کہ ایک مختلف انسان بن جانے کو اس انسان سے مختلف ہو جانے کے مترادف نہ سمجھیں جو ہم کبھی بننا چاہتے تھے۔
آخرکار، وہ شخصیت جس کا تصور ہم نے کبھی اپنے لیے قائم کیا تھا، ہماری اسی وقت کی امیدوں، خواہشات اور خوابوں سے تشکیل پائی تھی۔ ممکن ہے کہ آج ہم اس سے مشابہت نہ رکھتے ہوں، لیکن اس کا یہ مطلب نہیں کہ ہمیں ان تمام خواہشات اور اقدار کو بھی فراموش کر دینا چاہیے جن کی بنیاد پر وہ تصور قائم ہوا تھا۔ شاید ہم اپنے ماضی کے وجود کے ساتھ اس حد تک وفادار نہیں رہ سکتے کہ ہمیشہ وہی انسان بنے رہیں، لیکن اتنے بے پروا بھی نہیں ہو سکتے کہ اسے مکمل طور پر بھلا دیں۔
اور اگر کبھی زندگی ہمیں اپنے اسی کم عمر وجود کے روبرو لا کھڑا کرے، تو شاید سب سے مشکل کام اسے یہ سمجھانا ہوگا کہ ہم یہاں تک کیسے پہنچے۔ اسے بتانا ہوگا کہ کچھ خواب پورے ہوئے، کچھ راستے بدل گئے، کچھ خواہشات وقت کے ساتھ اپنی اہمیت کھو بیٹھیں اور کچھ ایسی حقیقتیں سامنے آئیں جن کا اسے کبھی اندازہ نہیں تھا۔ شاید وہ ہماری تمام وضاحتوں سے مطمئن نہ ہو، شاید وہ کچھ سوالات بھی کرے جن کے جوابات آج بھی ہمارے پاس موجود نہ ہوں۔
لیکن میں امید کرتی ہوں کہ اس گفتگو کے اختتام پر ہم اسے یہ ضرور بتا سکیں گے کہ ہم نے کوشش کرنا نہیں چھوڑی۔ کہ ہم نے اپنی زندگی کو محض ان توقعات کے مطابق گزارنے کی کوشش نہیں کی جو کبھی ہم نے اپنے لیے قائم کی تھیں، بلکہ اسے سمجھنے، بہتر بنانے اور اپنی مرضی سے جینے کی کوشش بھی کی۔ اور شاید اسے یہ یقین دلانا بھی ضروری ہوگا کہ اگرچہ ہم وہ انسان نہیں بن سکے جس کا اس نے کبھی تصور کیا تھا، لیکن اس کا مطلب یہ نہیں کہ ہم نے اسے مایوس کرنے کے لیے زندگی گزاری۔
کیوں کہ آخر میں، ہم سب اپنے اندر کسی نہ کسی شکل میں اس کم عمر انسان کو لیے پھرتے ہیں جو کبھی ہمارے مستقبل کے بارے میں بے شمار خواب دیکھا کرتا تھا۔ اور شاید زندگی بھر کی تمام تبدیلیوں، تجربات اور نامکمل خواہشات کے باوجود، ہم پر اتنا قرض ضرور باقی رہتا ہے کہ جب کبھی ہمارا سامنا اس سے ہو، تو ہم نظریں جھکانے کے بہ جائے اسے اپنی کہانی سنا سکیں۔
.
(ادارے کا بلاگر سے متفق ہونا ضروری نہیں، آپ اپنے بلاگ samywar.com@gmail.com پر بھیج سکتے ہیں)