الطاف حسین دور میں زمینوں پر قبضہ ناممکن تھا

سمے وار (تحریر: سید فیصل حسین)
ایک سال قبل دوستوں کی ایک محفل میں ایک صاحب نے کہا کہ سسٹم جس طرح کراچی کی زمینوں پر قبضہ کررہا ہے وہ دن دور نہیں جب پرانی آبادیوں میں ہماری ملکیت مکانات پر مسلح افراد آکر بولیں گے یہ گھر ہمارا ہے اس کے کاغذات ہمارے نام ہیں اور طاقت کی بنیاد پر اصل مالک کو باہر نکال کر خود قبضہ کرلیں گے اس وقت ان صاحب کی بات پر سب کو ہنسی آگئی کہ ٹھیک ہے لاقانونیت ہے مگر ایسی بھی اندھیرنگری نہیں ہوسلتی کہ جس مکان میں ہم کئی عشروں سے رہے رہے ہیں اس کی ملکیت کے کوئی جعلی کاغذات بنالر اس کا دعوے دار بن جائے مگر جمعرات کی شب گلشن اقبال میں بالکل ایسا ہی واقعہ ہوا تو یہ بات یاد آگئی اب ہمارے مکانات بھی غیرمحفوظ ہوچکے ہیں یہ کیسی بے بسی ہے
پہلے والی “ایم کیوایم” کی موجودگی میں ایسا ممکن نہ تھا کہ اس کے زیرکنٹرول علاقوں میں ایسا کوئی کرسکے اب وہ احساس تحفظ رہا اور نہ ہی وہ چولیدار رہے ، اب صورت حال مختلف ہو چکی ہے اگر جمعرات 27 نومبر 2025 کو جماعت اسلامی کے کارکنان مزاحمت نہ کرتے ، پولیس ، غنڈوں اور بندوق کے سامنے کھڑے نہ ہوتے تو ایک شخص اپنی جائیداد سے محروم ہوجاتا
جمعرات کا واقعہ ایک اور سبق دیتا ہے ظالم کتنا سفاک ہو کتنا طاقت وَر اور بے رحم ہو کتنے ہی سرکاری ادارے اس کے پشت پر ہوں یا اس کے ساتھ کھڑے ہوجائیں عوامی مزاحمت کے سامنے اس کی کوئی اوقات نہیں ہوتی
دعا کریں جمعرات کا واقعہ ظلم کے سامنے سینہ تان کر کھڑے ہونے کا آغاز ہو اور یہ جذبہ تھمے نہیں اگر واقعی ایسا ہوگیا تو کراچی پر ظلم لرنے والوں کی شامت کا آغاز ہے جس کی بنیاد جماعت اسلامی کے کارکنوں نے رکھ دی ہے
70 کی دہائی میں جماعت اسلامی نے کیا کیا؟
80 کی دہائی میں کیا کیا؟
افغانستان اور کشمیر میں کیا کیا؟
کراچی میں سب سے پہلے اسلحہ کون لایا؟
مذہب کو کس نے کیسے استعمال کیا اس بحث میں الجھے بغیر کم از کم اس بات پر جماعت اسلامی کے ساتھ ضرور کھڑے ہوں وہ کراچی پر ظلم کرنے والوں کے سامنے کھڑی ہورہی ہے حافظ نعیم الرحمن کے علاوہ اس وقت کراچی میں کوئی نہیں جو اپنے کارکنوں کی مدد سے ظالم کو دبوچ لے اگر کوئی اور ایسا کررہا ہے تو ضرور بتائیں ورنہ ایک بات یاد رکھیں جو گروہ آپ کے بدترین سفاک دشمن کے سامنے کھڑا ہورہا ہے اگر اس کے ہاتھ مضبوط نہ کئے تو وہ گروہ بھی ہمت ہار کر بیٹھ جائے گا اس میں نقصان صرف و صرف آپ کا ہے آپ کی مرضی ہے کہ جماعت اسلامی کی ماضی کی غلطیاں تلاش کرتے رہیں اور اپنے آپ کو ظالم کے رحم و کرم پر چھوڑ دیں یا اس کے حال کے کردار پر اس کا ساتھ دے کر اپنے آپ کو محفوظ بنالیں
مزاحمت ہی میں زندگی ہے جمعرات کی رات جیسی مزاحمت شروع ہو جاتی ہے اور اس مزاحمت کرنے والے گروہ کو عام لوگوں کی مدد مل جاتی ہے تو کچھ ہی عرصے میں وہ ظالم منہ کے بل گرپڑے گا جس نے اہل کراچی کا سانس لینا بھی محال کردیا ہے اور اس کا سسٹم ایک عفریت بن کر پورا شہر نگل رہا ہے۔
۔
(ادارے کا بلاگر سے متفق ہونا ضروری نہیں، آپ اپنے بلاگ samywar.com@gmail.com پر بھیج سکتے ہیں)